• Subscribe to our newsletter and never miss a single post - for FREE
Daily Xitsonga

Tirhiselo ra “A Hi Loseni/Ha Losa/Ku Losa”

Ririmi i muhandzu wa ndhavuko, hi hala tlhelo, ndhavuko wu hlavuteriwa hi ririmi.

Marito ma ririmi rimbe, hambi ma ringeta hi matimba, ma tsandzeka ku hlavutela vuherhi bya ndhavuko. Eka ririmi, marito ma tirha hi swiyenge na swigava, ku ya hi ndhawu na ntikelo wa mhaka, kumbe ku ya hi munhu loyi ku vulavuriwaka na yena, na hungu leri marito ma lavaka ku ri hundzisa.

Eka nkarhi lowu nga hundza, ku ve na tsalwa leri ri hlamuselaka mongo na tirhiselo ra rito “Avuxeni“, ku tlhe ku va na tsalwa leri nga hlamusela mongo na tirhiselo ra rito “Ndzawini”

Leri tsalwa, ri languta mongo na tirhiselo ra “A Hi Loseni/Ha Losa/Ku Losa”

Hi Xitsonga, ku losa i ku xeweta, kambe, i ku xeweta ko fundzha xivongo kumbe gandzelo ra muxewetiwa. Ku losa, i xewetelo ra xiyimo xa le henhla, leri kombaka ku, muxeweti u tiyisisa vukulukumba na vukosi bya Mutsonga-kulobye.

Loko ku losiwa, ku xiximiwa xivongo xa loyi a xewetiwaka, na mfungho wa xivongo xexo, na gandzelo ra xivongo xexo. Nakambe, rito “Xiloso”, i rito ra Xitsonga leri vulaka xivongo, ngopfu hi ku tlhe ri komba nyimba ya xivongo xexo.

Ku Losa, i ndlela yo xeweta hi ku tlhokovetsela va muti, i ndlela yo huwelela vukulukumba bya muti, na vukulukumba bya gandzelo kumbe mfungho wa muti.

Ku Losa, i ku fundza vukulukumba bya xivongo.

Hi Xitsonga, munhu a nga losiwi hi vito ra yena, u losiwa hi xivongo xa yena.

A hi loseni!

 
Previous ArticleNext Article

Leave a Reply

Your email address will not be published. Required fields are marked *