• Subscribe to our newsletter and never miss a single post - for FREE
Daily Xitsonga, Tinxaka ta Vutsonga

5 reasons why Tsonga surnames have more than one Tsonga spelling for the same surname

Ririmi ra Xitsonga, ri kule ngopfu, eka ndhawu leyi tsemakanyaka mune wa matiko. Ririmi ra Xitsonga ri na marin’wana, na marin’wana-ntsongo mo hlaya. Marin’wana lawa, handle ko ma hambana hi marito ku vula xilo xin’we (ku fana na Minhlata vs. Min’whambo, marin’wana mo tala ma Xitsonga ma tirhisa Nhlata/Minhlata, kasi Xibila xi tirhisa N’whambo/Min’whambo), ku na leswiya swo hambana hi mpfumawulo, wa rito rin’we.Minkarhi yo tala, mimpfumawulo leyi, yi hambana ntsena hi Switwari kumbe hi Switatisi, ku fana na Mihlata vs Minhlata.

Tsalwa leri, ri ta languta mhaka yo Vatsonga va landzulana, hambi va ri va xivongo xin’we, ku ri mhaka yo hambana ka Xitwari xin’we ntsena. Tsalwa leri, ri ta tlhe ri kombisa na hi mhaka ya tsalelo ra swivongo swa Vatsonga, tani hi ku, va ha tele Vatsonga lava va landzulanaka va tlhe va khirhana, va ri va xivongo xin’we, hi mhaka ku, hinkwavo, xivongo xa vona xi tsariwe hi marin’wana ma Xitsonga. Switwari leswi pfilunganyaka ngopfu Vatsonga, i A, E na I eka xivongo xin’we, ku landzela O na U eka xivongo xin’we. Nakambe, tsalwa leri, ri ta kombisa no hlamusela mhaka yo xivongo xin’we xi ri na ku tsariwa hi L kumbe Y.

Marin’wana ma Xitsonga, ma na tirhiselo leri landzaka ua mimpfumawulo ya Switwari na Switatisi:

#1 – Xitshwa, Xinyondroma (Xirhonga-Xidzi) na Xihlanganu, hi kanyingi, ku tirha A, eka xivongo lexi eka marin’wana man’wani, ku tirhaka E (Xihlave, Xibila) kumbe I (Xin’walungu, Xidzonga);

Hlavangwana
Hlungwana
Hobyana
Hon’wana
Maluleka
Mangwana
Manyisa
Masinga
Masiya
Mbowana
Mhangana
Mondlana
Munisa
Nsumbana
Ntimana
Ntivana
Xipalana etc…

#2 – Swivongo leswi nga kombisiwa la henhla, loko swi ya eka Xihlave, Xilenge kumbe eka Xibila, Xitwari A xi hundzuka E;

Hlavangwane
Hlungwane
Hobyane
Hon’wane
Maluleke
Mangwane
Manyise Masinge
Masiye
Mbowane
Mhangane
Mondlane
Munise
Nsumbane
Ntimane
Ntivane
Xipalane etc…

#3 – Eka Xidzonga, Xin’walungu na Xihlengwe, mimpfumawulo ya Switwari swo hetelela, yi hundzuka I;

Hlavangwani
Hlungwani
Hobyani
Hon’wani
Mangwani
Manyisi
Masingi
Masiyi
Mbowani
Mhangani
Mondlani
Munisi
Nsumbani
Ntimani
Ntivani
Xipalani etc…

#4 – Xitwari O na Xitwari U, swi na ku hambana ko a ku twali hi minkarhi yo tala. Kambe swi tikomba onge, loko munhu a dzikisa Xihlave, na mimpfumawulo yin’wani ya Xihlengwe, ku twala O, kasi eka marin’wana laman’wani, ku twala U;

Chamango – Chamangu
Chavango – Chavangu
Makamo – Makamu
Masango – Masangu
Xitlhango – Xitlhangu etc…

#5 – Xana ku hambana ka swivongo swa Vatsonga leswi nga na L na leswi nga na Y, ku ri hi ku i swivongo swin’we, ku pfa kwi?

Mimpfumawulo ya L, a yi tikela Vangoni va ka Soshangaan loko va fika eVutsonga. Vatsonga lava a va ri na mavito, kumbe swivongo leswi nga na mpfumawulo wa L, wu hundzuluxiwe wu va Y. Hi ku famba ka nkarhi, ku na Vatsonga lava nga amukela ku tirhisa Y ematshan’wini ya L.

Bila – Biya
Makaringi – Makayingi
Malaze – Mayaze
Marimele – Mayimele
Maringa – Mayinga
Maxele – Maxeye
Milaleni – Miyayeni
Mitileni – Mitiyeni
Ndlala – Ndlaya
Siwela – Siweya etc…

Ku hambana ka mpfumawulo wa Xitwari kumbe Xitatisi, a swi ringani ku va xivangelo xo mi landzulana, mi ri va gandzelo rin’we. Xo hetelela, mi nga pfumeli ku, loko ku tirhisiwe tsalelo ra tindzimi ta vambe, ku tsala swivongo swa n’wina, ivi n’wina mi swi endla xivangelo xi landzulana.

Vutsonga i Vukosi.

 
Previous ArticleNext Article

Leave a Reply

Your email address will not be published. Required fields are marked *