Ntivo-Dzedzedze (Useful info on Malaria)

Vuvabyi bya Dzedzedze (MALARIA), i vuvabyi lebyi nga na vukarhi ngopfu. Vuvabyi lebyi, bya swi kota ku koxa vutomi bya munhu hi nkarhi wutsongo, kambe i vuvabyi byo tshunguleka, byo sirheleleka.

Ntivo-Dzedzedze (Useful info on Malaria):

Xana vuvabyi bya Malaria byi vangiwa hi yini?

Vuvabyi bya Malaria byi vangiwa hi xitsongwa-tsongwani lexi vuriwaka “Plasmodium”.

Xana vuvabyi bya Malaria byi hangalaka no tlulela hi ndlela yihi?

Vuvabyi bya Malaria byi hangalasiwa hi nsuna ya xisati ya muxaka wa “Anopheles”. Nsuna leyi, u nge yi voni hi tihlo, ivi u yi hambanisa na tinsuna timbe, tani hi ku, eka tihlo ra munhu, tinsuna ti languteka na ti fana. Loko nsuna leyi yi lume munhu loyi a nga na vuvabyi bya Malaria, yi rhwala xitsongwa-tsongwani, ivi loko yi ya luma munhu un’wani, yi n’wu chela xitsongwa-tsongwani. Xitsongwa-tsongwani lexi, xi fika xi tshama eka xivindzi, ivi xi hlasela timbembe ta ngati (Red Blood Cells) emirini.

Xana xitsongwa-tsongwani lexi xi teka nkarhi wo fika kwi na munhu a nga se vabya?

Ko tala, xitsongwatsongwani xa “Plasmodium” xi hundzuka vuvabyi endzhaku ka khume ku ya ka khume-ntlhanu wa masiku.

Xana vuvabyi bya Malaria byi tikombekisa hi yini?

Ku hisa ka miri.
Ku hlata.
Ku pfumala rinoko ra swakudya.
Ku tsana ka miri.
Ku pandza ka nhloko.
Ku lahlekeriwa hi mihleketo.
Ku khwanyala ka swirho.

Xana vuvabyi bya Malaria byi nga siveriwa hi tindlela tihi?

Ku tirhisa ritavani ro pfalela tinsuna (Mosquito net).
Ku tirhisa mafurha mo hlongola tinsuna (Mosquito repellent lotions).
Ku pfumelela va ndzawulo ya rihanyo ku va fafazela etindlwini.
Ku hlakula nhova eswitandini, yi tlhe yi hlengeletiwa yi hisisa.
Ku pfala magoji lama nga hlayisaka mati hi minkarhi ya timpfula.
Ku dya swakudya leswi pfunetaka ku lwa na vukarhi bya Malaria, swo fana na Nkaka, Muringa, Bomu na muhavulo wa Nxambalakati, wa pfuna swinene.