Papa ra ntima dzwii!
ri nga funengeta xibakabaka eVuxeni
Nganakati ya Nyathi
N’waGuwela
Mongwe wo lulama
Mumbi u ale ku ku komba sana ra Dzivamisoko
Rito ra wena ro tsokombela ri sala ri n’unun’uta
etindleveni ta varhandziwa lava xukuvaleke hi xivundza xo siyiwa
Bellah
Mbhuri hi Xitsonga!
Va ri ku fa i ku etlela
kambe nsika a yi etleli
Nyeleti yerhu ya vuxa
yo hi voningela hi vurhonga
u ku; “ri nge fi hi ri kona”
u vula lera ka manana
Xana a ku ta va mani?
Musweki wa mbita ya Tidyondzo?
Phe Xitsonga xi ri i ra Manana
Ina
Ta’Dinny
Mhakhi
Tati
Hahani
Kokwana
Nganakati
Hosinkati
Mudyondzi
Mudyondzisi
Ntivindza ya Rixaka
Ku rila ka Mongwe
Ku rila ka Nyathi
i ku rila ka Rixaka rerhu
Nkosi wa le Vutsonga wu twala na le xibakabakeni ku tsana tinyeleti
Dyambu ra Nyenyankulu ri khomiwa hi tingana
N’weti wa Dzivamisoko wu nyuma ku vangama
Wu ta vangama njhani nyeletana yerhu yi lo whii?
Image source: munghanalonenefm.co.za