• Subscribe to our newsletter and never miss a single post - for FREE
Entertainment, Matimu

Nhungu wa Tihosikati ta Vunanga bya Xitsonga to hlawuleka

Swi na nkoka ku tlangela tinsini ta vavasati ta vuyimbeleri bya Xitsonga, va na xiave xikulu eka nhluvukiso wa Xitsonga, Vatsonga na Vutsonga hi tlhelo ra vunanga. Tsalwa leri i nxanxameto wa Tihosikati ta vunanga bya Xitsonga leti ti nga tisa mimpfumawulo, minsumo  na bombo ro ka ri nga rivaleki eVutsonga.

  1. Khatisa Chavalala

Mhani Khatisa Chavalala hi van’wani va tinsini to sungula ta vavasati ta Vatsonga to kandiyisa vunanga bya Xitsonga. I xirhandwa eka vakhale na va tingoma, Mhani Khatisa i OG.


  1. Zaida Nhlongo 

Ku hava nsini ya xisati leyi nga fikelela eka vutshila bya Zaida.

A ku ri wansati wa rito ro xonga, a tlhe a kota ku cina; mincino ya yena yi hlohlotele vo tala. Minkadziyiso ya yena yi voniwi ku suka Uganda, Tanzania, DRC, Cameroon na le Ghana; wa tiveka Zaida. Rifu hi rona ri nga tsemerisa gondzo, kambe tinsimu ta yena to fana na Zabelani, Kedibone na Alfândega ta ha yimisa vanhu na namutlha.

Zaida i Hosinkati ya vacini.


  1. Shinyori Sisters (Xinyori Sisters)

Image: play.spotify.comShinyori Sisters hi wo ntlawa wu ri woxe eVutsonga lowu nga va kona wu tlhe wu va eka rhendzeleko nkarhi wo leha eka vunanga bya Xitsonga. Hambi leswi nkarhi wo tala ku tlhomiwaku Dr. Thomas Chauke tinsiva, a ku nga ta va na Xinyori handle ka Shinyori Sisters. Hi vo vahlayisi na swibombi swa yimbelelo ro hlawuleka ra vunanga bya Xitsonga bya katara.

Conny Chauke a nga ta va Conny Chauke loko a ku nga ri nyiko ya manakwe.

Shinyori Sisters i Tihosikati ta vo maseve.


  1. Ntombhi Marhumbini Ngwenya
Image: mp3red.co

Ntombhi, ku suka eka nkandziyiso wa yena wa madyondza, Marhumbini, lowu nga xavisa swinene, u tiendlele vito eka vunanga bya Xitsonga, hi rito ra yena ro xonga ngopfu. Ndzhaku ka Marhumbini, nkandziyiso wa vumbirhi, “Jelani Jelani”, wu vuye wu sindza vito ra Ntombhi eka matimu ya vuyimbeleri bya Xitsonga. Ku fana na Zaida, loyi va nga tirha swin’we, na yena Ntombhi, u lo tsemerisiwa hi rifu.

Eka vunanga bya Disco, Ntombhi hi yena Nganakati.


  1. Sunglen Chavalala
Image: shazam.com

Sunglen u ke a nga duma swinene, hi nkandziyiso wakwe wa Disco ya Xitsonga. Nkarhi wa kona, a vitaniwa Helela, nkandziyiso wa yena wa Helela, la a nga tirhisana na Jeff Maluleke na Arthur Mafokate, a wu ri na tinsimu to fana na Va Ni Tiva, Helela, Mbitsini. Wu veke vito ra Sunglen, na le handle ka ndzilikani wa Vutsonga. Na namutlha, hala Zambia, Malawi na le Tanzania, loko u ku Helela, va ta ku byela ku byebyo i vunanga.

Sunglen u ve a vuya a duma loko a humesa album ya Beer, leyi yi nga ba ngopfu la South Africa ku fika laha Sunglen a nga kuma sponsorship ku huma ka SAB.


  1. Maggie “Makhanani” Vilankulu

N’waVilankulu, loyi a nga tiveka hi vito ra Makhanani eka swa vuyimbeleri, u sungule ku tiendlela vito, eka ntlawa lowu a wu vuriwa Mashudu Sisters. Risimu ra Makhanani, ri hetelele ri va vito leri Maggie a nga ri tirhisa eka vuyimbeleri bya yena.

Risimu ra Maggie ra Bomba Gaza, ku ve rin’wani ra tinsimu ta Xitsonga leti nga tlangiwa ngopfu eka SABC TV hi minkarhi ya rona. Maggie u tirhe na va Percy Mfana, minkarhi liya Chavani a va ha yimbelela Disco. Maggie u tirhe ngopfu na Ntombhi Marhumbini, laha va nga endla minkandziyiso leyi nga duma ngopfu, tinsimu to fana na U Ni Dyise Yini Dali, Chucha, Vanhu Va Misava, Xifamona.

Maggie, Ntombhi, na Zaida ku ve vavasati lava va nga tirha swin’we eka vuyimbeleri, va nga ri na mhaka na mindzilikani leyi avaka Vatsonga.


  1. Esta M
Image: iTunes – Apple

Esta M, hi rito ra yena ro kenkela bya vulombe u tshame a khoma misava hi nhonga ya yena. Nkadziyiso wa yena wa madyondza, Sakamela, wu yimise Afrika Dzonga, Lesotho, Zimbabwe, Botswana, Mozambique, Swaziland, Malawi na Zambia hi milenge. Esta M a ku ri yena Nganakati ya swiyimbeleri swa Disco leswiya a swi kumeka endzeni ka tshanga ra Joe Shirimani (Xirimani). Tinsimu to fana na Sakamela, I Nawu, Swikwembu, Cheleni, ti kombise nyiko ya Esta M handle ko kanakana.


  1. Vuyelwa
Image: iTunes – Apple

Vuyelwa u tiendlele vito tani hi xiyimbeleri eka tshanga ra mufi Peta Teanet. Loko Teanet a lova, se a ku humesiwe Vuyelwa Volume 5 Xilahla. Nkandziyiso lowu, wu olovise ngopfu emhakeni yo, Vuyelwa a sala a ya emahlweni na vuyimbeleri. Vuyelwa, i munhu loyi rito ra yena ri nga tirha swinene ku yimbelela mivuyelelo eka swiyembeleri swo tala swa vunanga bya Xitsonga, ku hundza 50 wa swiyimbeleri, swi ve na nkateko wo yimbelela na Vuyelwa.

 
Previous ArticleNext Article

1 Comment

Leave a Reply

Your email address will not be published. Required fields are marked *