• Subscribe to our newsletter and never miss a single post - for FREE
Daily Xitsonga

Hi kulungela siku ro tlangela Ririmi ra manana

“Ririmi i mpfumawulo lowu nga rimintsu ra rixaka.”

Namutlha, siku ra 21 Nyenyanyana, i siku leri tlangeriwaka emisaveni hinkwayo, tani hi siku ra ririmi ra manana. Hi ku ya hi Huvo ya Nhlangano wa Matiko yo Kondletela Dyondzo, Vutshila na Ndzhavuko (UNESCO), nkoka wa siku leri, i ku “kondletela mapfhumba mo kucetela ku hlayisiwa no sirheleriwa ka tindzimi leti vulavuriwaka hi vanhu hinkwavo la misaveni”.

Handle ka sweswo, nkoka wa siku leri, i ku lemukisa vanhu va misava ku amukela vukona bya tindzimi to hambana hambana, no teka ku hambana ka tindzimi tani hi ku fuwa ka misava. Swi na nkoka loko vinyi va ririmi va ri hlayisa, va ri xixima, va ri hluvukisa, va tlhela va ri paluxa. Ku hlayisa, ku xixima, ku hluvukisa no paluxa ririmi ra Xitsonga, i vutihlamuleri bya Vatsonga. Ku hava loyi a nga hlayisaka, no hluvukisa ririmi ra vambe loko vinyi va rona va nga endli tano. Ku rhandza ririmi ra manana, a swi vuli ku u fanele u venga no avanyisa vanhu hi ku ya hi ririmi. Rhandza ririmi ra wena, u tlhela u xixima vukona bya tindzimi ta vambe.

Vulavula ririmi ra wena na u nga chavi, tsala hi ririmi ra wena eka  Swiyenge swa Vuhlanganisi swo fana na Facebook na Twitter; tirhisa ririmi ra wena eka swiphato, tirhisa ririmi ra wena eka vuyimbeleri, a hi nandzu, na swona, u nga chavi, u nga tichavi.

Ririmi a ro tirha ntsena ku hundzisa hungu, kambe, hi rona xigandlo lexi fungaka rixaka.

Matimba ya ririmi, ya le ka rixaka leri tinyungubyisaka hi ririmi ra rona. Loko vinyi va ririmi va nga tinyungubyisi hi ririmi ra vona, ririmi rero ri hela matimba, ra fa. Ku fa ka ririmi, i ku fa ka rixaka.

 
Previous ArticleNext Article

Leave a Reply

Your email address will not be published. Required fields are marked *