• Subscribe to our newsletter and never miss a single post - for FREE
Daily Xitsonga, Tinxaka ta Vutsonga

Matsalelo ma Swivongo hi Xitsonga vs. hi Xizulu, Xishona, Xivenda, Xisotho na Xiputukezi

0 3131

“Rixaka leri nga hlonga, ri hava matimba eka ririmi ra rona.” – Mabanga Mahungele

Tsalwa leri, ri ta xaxameta swin’wana swa swivongo swa Vatsonga leswi swi nga na matselelo mo hlaya.

Kambe lexi hlamarisaka ngopfu, i ku landzulana exikarhi ka Vatsonga va xivongo xin’we hi mhaka tsalelo rinene ra xivongo. Xana i yini lexi endlaka Vatsonga va landzulana no avanyisana, hi mhaka tsalelo ra xivongo kambe va ri va xivongo xin’we?

Eka Vatsonga lava va nga va na nkateko wo dyondza ririmi ra Xitsonga, va swi vona ku; mavito ma Vatsonga, swivongo swa Vatsonga, loko hi ta eka tsalelo, ku pfa ku tirhisiwa tsalelo ro a hi ra Xitsonga. Etikweni ra Afrika Dzonga, swivongo swa Vatsonga swi na ku tsariwa hi Xisuthu, Xivhenda na Xizulu. eZimbabwe kona, swi na ku tsariwa hi Xishona, ivi eMozambique swi pfa swi tsariwa hi Xizulu na Xiputukezi. Hambi swi ri tano, nhlayo ya Vatsonga lava swi twisisaka loko swivongo swa vona swi nga tsariwangi hi Xitsonga, yi le henhla. Kambe, nhlayo ya Vatsonga vo landzulana hi mhaka tsalelo ro hambana, na yona yi le henhla.

Xo sungula, ku na ku hambana ko vitana no tsala xivongo hi ku ya hi marin’wana ma Xitsonga, ivi ku va na ku hambana hi ku tirhisa tindzimi timbe. Xikombiso;

Tivana/Tivane/Tivani/Ntivane – i ku hambana hi ku ya hi marin’wana ma Xitsonga. Kambe, Tibana/Tibane i ku hambana hi ku tirhisa ririmi rimbe.

Na hi nga se ya ekule, n’wina Vatsonga lemukani ku, tsalelo ra tinxaka timbe, nkarhi un’wana a hi mhaka mona kumbe ku tekela hansi rixaka ra Vatsonga, kambe i mhaka ku; tinxaka teto, ti hava mimpfumawulo yo karhi ya Xitsonga. Tirhiselo ra vona ra switatisi leswi: – B, C, CH, D, HL, K, NY, N’W, V, W na X – ra hambana na tirhiselo ra Xitsonga. Tindzimi tin’wani a ti tirhisi switwari leswi, hambi tirhiselo ra switwari E na O, ri fika ri hambana na ra Xitsonga.

Swi tshami hi ndlela leyi; 

B, C na V

  • Xisuthu xi hava C wo landziwa hi xitwari, xi hava na V, xisweswo; swivongo swo fana na MACEKE, MACEVELE swi hundzuka Macheke na Machebele, ivi MAVUNDA, NDOVE swi hundzuka Mabunda na Ndobe.
  • Xizulu, xi na C wo landziwa hi xitwari, kambe mpfumawulo wa hambana na wa Xitsonga. V wa Xizulu wa hambana na wa Xitsonga; MACEKE, MACEVELE swi hundzuka Matsheke na Matshebele.
  • Xivhenda xi fana na Xizulu eka mpfumawulo wa Xitsonga wa C, kasi V ya Xivenda yi hambana V ya Xitsonga; MACEKE, MACEVELE swi hundzuka Matsheke na Matshevhele.
  • Xiputukezi xi hava mpfumawulo wa C ya Xitsonga, xi hava na K; MACEKE, MACEVELE swi hundzuka Macheque na Machevele.
  • Xishona eka mpfumawulo wa C wa Xitsonga, xi tirhisa CH, eka V ya Xitsonga xi tirhisa VH, xisweswo; MACEKE na MACEVELE swi hundzuka Macheke na Machevhele.

HL na NY

  • Nakambe, Xiputukezi xi hava NY na K ya Xitsonga, mpfumawulo wa NY wa Xitsonga, eka Xipukezi ku tsariwa NH, ivi mpfumawulo wa K wu tsariwa hi C; NYALUNGU, NYANKALE swi hundzuka Nhalungu na Nhancale.
  • Xivongo xa Xitsonga lexi nga na HL, tani hi ku hi Xiputukezi na Xishona, ku hava mpfumawulo wa HL, mpfumawulo wa HL wu tsariwa hi CH kumbe hi SH; HLUNGWANI, MUHLANGA swi hundzuka Chunguane na Muchanga, ivi HLALUKO eka Xishona yi hundzuka Sharuko.

NY

  • Xiputukezi xi hava NY, mpfumawulo wa NY xi wu tsala hi NH; MANGANYE yi hundzuka Manganhe.
  • Nakambe, Xiputukezi xi hava K; mpfumawulo wa K, wu tsariwa hi C kumbe QU.

N’W

  • Xizulu na Xiputukezi, swi hava mpfumawulo wa N’W, Xiputukezi xi tirhisa M kasi Xisuthu xi tirhisa NG; N’WAMBA i hundzuka Ngoamba na Moamba.

K

  • Xiputukezi xi hava K, mpfumawulo wa K wu tsariwa hi Q kumbe C; xisweswo, MALULEKE, RIKHOTSO swi hundzuka Maluleque na Ricotso.

X

  • Xisuthu xi hava X, kasi X ya Xizulu ya hamba na X ya Xitsonga. Mpfumawulo wa X ya Xitsonga i SH hi tindzimi teto; xisweswo, CAWUKE i hundzuka Shawuke. 
  • Xiputukezi xi na yona X, kambe mpfumawulo wa X ya Xiputukuezi, hambi leswi wu fanaka na wa Xitsonga, wu pfa wu tsariwa hi CH; MAXELE, XIVAMBU swi hundzuka Mashele/Machele, na Shibambu/Chivambo.

Leswi i swikombiso ntsena, ku komba ku vito rin’we ra Xitsonga loko ri tsariwa hi tindzimi to hambana, swi hetelela swi va xivangelo xo Vatsonga va landzulana. Vatsonga, tani hi vinyi va swivongo, hi vona va faneleke ku koxa no tiyisisa ku swivongo swa vona swi tsariwa hi Xitsonga. Leswo Vatsonga va landzulana no avanyisana hi mhaka ku hambana ka peletelo, nkarhi un’wani va landzulana hi matsalelo mo hinkwawo a hi ma Xitsonga, i ku kokela endzhaku – xikombiso: Mokhari na Mokgare, i MUKHARI hinkwavo.

Hi leswi swikombiso swin’wani – tsalelo ro sungula, i ra Xitsonga, ivi ku landzela swikombiso swa matsalelo mo hambana ma tindzimi timbe. 

  • CAWUKE (Chauke, Chauque, Tshawuke, Shawuke)
  • KHOSA (Khoza, Khossa, Cossa)
  • MAKHUVELE (Makhubele, Macuvele)
  • MARHOLENI (Maroleng, Maruleng)
  • MASIYA (Masia, Macia)
  • MATHEVULA (Mathebula, Matshebula, Mashewula)
  • MAVASA (Mavhasa, Mabasa)
  • MAVONA (Mabona, Mavhona)
  • MAVUNDZA (Mabunda, Mabonda, Mawunda)
  • MAXAVA (Mashava, Mashavha,Mashaba, Machava, Machaba)
  • MUKHARI (Mokhari, Mokgare, Mocari)
  • NDOVE (Ndobe, Ndovhe, Ndhobe)
  • NGOMANI (Komane)
  • NGOVENI (Ngobeni, Ngovheni)
  • NKUNA (Nkhune)
  • N’WAMBA (Moamba, Ngoamba)
  • RIVOMBO (Lebombo, Libombo)
  • TEMBE (Mthembu, Themba)
  • VALOYI (Baloi, Baloyi, Valoi)
  • XIKWAMBANI (Shikwambani)
  • XILOWA (Shilowa, Chilowa)
  • XIRINDZA (Shirinda, Silinda)
  • XIVAMBU (Shibambu, Shivambu, Sebambo)
  • XIVURI (Shiburi, Shivuri, Sibuyi, Chiure)

Swi tele swivongo hi nga kombisaka hi swona, xikongomelo i ku lemukisa Vatsonga ku, hungutani ku landzulana hi mhaka ku hambana ka tsalelo ra swivongo swa n’wina.

Vutsonga i Vuksoi. 

 
Previous ArticleNext Article