Hambi loko Vatsonga va hambana hi mindzilikani, loko swi ta eka ku hlaya mali, ku hlayiwa ku fana, loko ku hlaya kwaloko ku tirhisa hlayelo ra twisiselo ra Vatsonga. Hi ta languta tirhiselo ra marito lama nga na ndhuma eka swa timali, hi languta na la ma humaka kona, hi languta ku a ma vula yini khale, na swona ma vula yini namutlha.
Tsalwa leri, ri lava ku hlayiwa hi vukheta ngopfu, swa endleka ri vulavula hi marito mo muhlayi u ma twa ro sungula.
Xiya-xiya timhaka leti:
- Loko hi vulavula hi British Pound, hi vulavula hi mali leyi a yi tirha eAfrika Dzonga ku ta fika lembe ra 1910.
- Loko hi vulavula hi South African Pound, hi vulavula hi mali leyi a yi tirha eAfrika Dzonga ku ta fika 1961.
- Loko hi vulavula hi Rand, hi vulavula hi mali leyi tirhaka eAfrika Dzonga ku suka 1961 ku ta fika sweswi.
- Loko hi vulavula hi Old Metical, hi vulavula hi mali leyi a yi tirha eMozambique ku suka 1980 ku ta fika 2006.
- Loko hi vulavula hi Metical, hi vulavula hi mali leyi tirhaka eMozambique ku suka 2006 ku ta fika sweswi.
Eka mali ya le Mozambique, hi ta komba mintsengo leya khale na leya sweswi, tani hi ku ku cince ntikelo wa mali, kambe vito ra mali a ri cincangi.
NONGOTI (TERMINOLOGY) WA MALI HI XITSONGA
PONDHO/MPHONDHO
Vito ra Mpondho ri pfela ka rito “Pound”.
Pound i mali leyi a yi tirha eAfrika Dzonga ku suka hi 1910, ku ya fika 1961. Kambe, Pound leyi, a yi tirhisiwa na le Rhodesia (Zimbabwe) na le Mozambique, ngopfu edzongeni. Hi lexi endlaka, hambi eZimbabwe na le Mozambique, Vatsonga va hlaya mali hi “Mpondho”.
Loko ku cinciwa Pound hi 1961, ku sungula Rand, ntsengo wa £1 a ku ri R2.
- Rand: Mpondho i R2
- Old Metical: Mpondho a ku ri 100Mts
TIKI
Vito ra Tiki, ri pfela eka “Tikey”.
Tikey, eka Pound ya khale, a yi ri 2 Cents & a Half. Tiki hi yona yi vuriwaka Zukwa. Loko ku cinciwe mali hi 1961, Tiki/Zukwa, yi ve 5 Cents; na sweswi, 5 Cents i Zukwa, van’wani va ri i Muzukwa.
Vito ra Tiki, se ra kalanyana, eka Vatsonga va masiku lawa.
- Rand: Tiki/Zukwa i 5 Cents
- Old Metical: Zukwa a ku ri 2.50 Mts
PENI
Vito ra Peni ri pfela ka “Penny”.
Penny a yi ri 1 Cent eka Pound.
Loko ku cinciwe mali hi 1961, Penny yi hundzuke 2 Cents.
- Afrika Dzonga: Peni i 2 Cents
FADENI
Vito ra Fadeni, ri pfela ka “Farthing”.
Farthing a ku ri mali yo nghena ka mune eka Penny. Farhting hi yona Quarter Penny, kumbe Kota-Peni. Farthing, a ku ri mali leyi a yi wela eka British Pound, na ku nga se va na Pound ya Afrika Dzonga. Tsundzuka ku, ku ta fika lembe ra 1910 a ku tirha yona British Pound, hi lexi endlaka rito lera Fadeni (Farthing) ri kumeka ra ha tirha.
Mali yo ringana na Farthing, namutlha a ya ha ri kona.
- Afrika Dzonga: Fadeni a yi kona
- Mozambique: Fadeni a yi kona
CHELENI
Vito Cheleni, ri pfela eka “Shilling”.
Cheleni kumbe Shilling, hi yona 10 Cents.
Nakambe, Shilling a yi tiveka tani hi “Bob”.
- Afrika Dzonga: Cheleni i 10 Cents
ZUKWA
Zukwa ka ha ri yona Tiki, ku nga 5 Cents eAfrika Dzonga.
NSUMBHULANI
Vito leri, se ra kala ngopfu, kambe a ri vula rhandi. Ku ri pfela kwi, swa kanakanisa, kambe, a ri tirha ngopfu na le migodini.
- Afrika Dzonga: Nsumbhulani i R1
KORONI
Vito leri, ri pfela ka “Crown”.
Eka British Pound leyi a yi tirha eAfrika Dzonga, ku ta fika lembe ra 1910 ku ta fika 1961, Koroni a ku ri Ntlhanu wa Macheleni (5 Shillings), kumbe Quater Pound.
Namutlha, Koroni yi ringana na 50 Cents.
- Afrika Dzonga: Koroni i 50 Cents
LOSO
Rito lera Loso, ri huma eka Xindhevele, ri vula Cheleni
NDHIVILICHI
Vito leri, ri pfela ka rito ro lombiwa eka Xindhevele, “Indibilitshi”.
Ndhivilichi i Fadeni kumbe Farthing.