• Subscribe to our newsletter and never miss a single post - for FREE
Entertainment

Mr Bow na Liloca i varhandzani

Endzhaku ka masiku, mavhiki na tin’wheti to hlaya, na ku ri na mavari-vari ya ku nyeleti ya vuyimbeleri bya Xitsonga, Mr Bow (Salvador Mayaze) na N’waMadade (Liloca) va rhandzana, vhiki leri, Mr Bow u tsale ka tluka ra yena ra Facebook, a vulavula hi laha khale ka nsati wa yena, Maria de Lurdes Patricio, a yisaka emahlweni mhaka yo onha vito ra King Bow hi kona.

Tsalwa ra Mr Bow ri komba wanuna loyi a xukuvaleke eka nkarhi lowu hundzekeke. King Bow u vulavula na hi la a nga tiyisela ku rhukaniwa, hi ku va a rhandzane na Maria de Lurdes, hambi leswi Bow a nga ntsongo hi malembe.

“Ndzi hume eka munti lowuya ntlhanu wa tin’weti leti nga hundza. Swivangelo swa ku hela ka vukati bya hina, swa tiveka eka maxaka ma hina, na yena khale ka nsati wa mina wa swi tiva.
Ni nge vulavuli hi swilo swo biha leswi ni hundzeke hi ka swona.
Sweswi ni tisungulela vutomi byintshwa”, ku vula Mr Bow.

Loko a ya emahlweni, a vula hi laha a nga ta kala a nga paluxi manyala lama nga humelela.

“Loko himpela no lava ku paluxa manyala ma rirhandzu ra mina na Maria de Lurdes, ni nga swi endla ntsena loko ku ri na vakulukumba va mina, ku nga Luis na Celestino, ku katsa na manana wa yena Maria de Lurdes, manana Aurora, tani hi ku hi vona vanhu lava nga ringeta ku tiyisa rirhandzu ra hina.”

Mr Bow u ye emahlweni a vula ku, sweswi se va hambanile, u vona swi ri kahle, tani hi ku, loko ingi swi ringanile ku va aka munti, ingi himpela va wu akile. Mr Bow u humese na mhaka leyi a yi kanakanisa vanhu, ku xana a va ri na vana vangani na Maria de Lurdes.

“Na vula hi ku tiyisisa, a hi nga ri na n’wana na un’we.
Kambe, lexi nga dlaya vukati lebyiya, a hi ku pfumaleka ka rirhandzu, i ku tikurisa ka Maria de Lurdes, leswi nga hetelela ni nga ha n’u voni tani hi wansati loyi ni tekaneke na yena.”

Nakambe Mr Bow u boxe ku, a hi ro sungula Maria de Lurdes a feriwa hi vukati.

“Khale ka nsati wa mina u na vana vanharhu na va tatana vo hambana. Ku hava ntsumi laniwa. Vukati bya yena eka mina hi byona byi nga heta nkarhi wo leha, byi hete mune wa malembe.
Lebyi ni nga n’u kuma na a hume ka byona, a byi hetanga na siku” ku vula Mayaze.

Mr Bow u tsundzuxe lava n’u hlaselaka hi xikongongomelo xo yimelela khale ka nsati wa kwe.

“Fambani mi ya n’u vutisa ku eka mune wa malembe lawa a nga hanya na mina xana i yini lexi hi nga va na xona swin’we? Ivi mi vuya na nhlamulo, a swi kona leswo ni nga va ni tshame na yena mune wa malembe na yena, kambe ni tsandzeka no xava bikiri.”

King Bow yi ya emahlweni: “La ni tshamaka kona sweswi, hinkwaswo i swintshwa, hambi swimbalo swa vananga swi sele kwele. Swilo hinkwaswo leswi a ni ri na swona na ni nga se tekana na yena, na leswi ni nga swi kuma na ni ri na yena, swi sele na yena”

Ku ya emahlweni: “Lexi ni hlamarisaka i ku khale ka nsati wa mina u ri a ni pfuni nchumu, kambe ku hi hambana ximfumu a nga swi lavi. Hikokwalaho ka yini a nga ni tshiki ni tifambela hi kurhula?”

Hi LILOCA, the Boss Lady,

“Ni nge swi koti ku tshama embhinyetweni. Na pfumela ku a ni swi tivi ku vhumba swa mundzuku, hinkwaswo ni swi tshikela Mumbi, swi tiviwa hi yena.”

Mr Bow u tiyisise mhaka leyi a yi famba hi ngulumelo:

“Ni tikumele munhu. Vito ra yena i Liloca”
“Leswo Liloca u ku yivele nuna, a hi ntiyiso. Naswona, mina Bow a ni xibyi ni nga ta yiviwa.
Mina ni munhu, na xi tiva xa kahle evuton’wini.”

Bow u tiyisa rirhandzu ra yena ka Liloca hi ku vula ku a nge tshiki ku yimbelela hi yena, no komba misava hinkwayo ku wa n’u rhandza. Leswi swi herisa mhaka ya mahungu-ndlela lama a ma vula ku The Super Double ya rhandzana, swi endla na ku varhandzi na vaseketeri va twisisi tinsimu to fana na “Ni Ta Fa Na Wena“, “You Are My Number One” na lera ha ku humesiwaka ra Liloca, “Meu Marido (Nuna Wanga)”

Image source: mmo.co.mz

 
Previous ArticleNext Article

Leave a Reply

Your email address will not be published. Required fields are marked *