• Subscribe to our newsletter and never miss a single post - for FREE
Entertainment, Lifestyle, VVX

Ntiyiso i ku ku hava vuyimbeleri bya Xigaza/Xichangani

Lebyi i Vunanga bya Xitsonga! Hi ba Xitsonga, Hi yingisela Xitsonga. Hi tlhela hi cina Xitsonga! Vunanga byi na xiave xikulukumba eka rixaka rin’wana na rin’wana, vunanga byi na nkucetelo eka vutitivi na vutivi bya rixaka rin’wana na rin’wana. Nakambe vunanga byi nga va na nkucetelo eka mahanyelo na maendlelo ya swilo eka rixaka rin’wana na rin’wana. Manguva lawa ku na xihoxo lexi xi nga ku endliweni hi vayimbeleri va vunanga bya Xitsonga, na vaseketeri va byona xikan’we na vahaxi va le ka switichi HINKWASWO leswi haxaka hi ririmi ra Xitsonga, ku suka ka MLFM, GCRFM, MALA FM etc; hinkwayo mintlawa leyi yi endla xihoxo xo vitana vuyimbeleri bya Xitsonga ku ri i vuyimbeleri bya Xigaza/Xichangana. Van’wana va endla xihoxo lexi hikokwalaho ka ku honisa kasi van’wani i ku pfumala vutivi, van’wana ko va bombo.

Eka vayimbeleri hinkwavo ko va Dr. Thomas Chauke va ha yimeke hi lero vitana vunanga lebyi hi vito ra byona, ku nga vunanga bya Xitsonga. Vatsonga vo tala na vayimbeleri vo tala va vunanga lebyi va na ntolovelo wo vula marito lawa “Hi ba Xigaza/Xichangana”, “Hi yingisela Xigaza/Xichangana”, kumbe va ku “Hi cina Xigaza/Xichangana”. Vuyimbeleri lebyo tsokombela a byi kalanga byi va Xigaza/Xichangana na siku na rin’we na swona byi nge pfuki byi ve Xigaza/Xichangana na siku na rin’we. Gaza Mkhatshwa, na loko o pfuka esirheni, a nge pfumeli ku lebyi, i vuyimbeleri bya yena. Na swona, swi sukela kwi swo thya vuyimbeleri bya rixaka hinkwaro, hi vito ra kokwa wa munhu? Hleketa se Dr. Chauke va ku va ba Ximantsena, va kha va vula kokwa wa vona. Loko Gaza na Soshangani lava vo pfuka kwele masirheni ma vona va nga cina loko mo va chayisela vunanga lebyi ke? Xana swihluke swa Gaza na Soshangani swi ve na xiave xihi eka vunanga lebyi? Xana mfumo wa Gaza wu ve na xiave xihi eka vunanga lebyi, na le ka Vatsonga hi ku angarhela?

Ntiyiso hi leswaku Gaza a nga kalanga a va na xiave eka vunanga lebyi, na swihluke swa yena a swi vanga na xiave eka vunanga lebyi. Rixaka ra ka Gaza loko a ri swi kotile ku fikelela swinavelo swa rona i nge ririmi ra Xitsonga ri file, leswi vulaka leswaku a ku nga ta va na vuyimbeleri bya Xitsonga. Hikokwalaho ka yini vuyimbeleri lebyi byi fanele byi vitaniwa hi mavito ya vanhu lava a va nga rhandzi rixaka leri ri byi yimbelelaka ke? Loko u ri munhu loyi a nga na dzano u nge thyi vito ra vuyimbeleri lebyi endlaka leswaku u tsaka loko u byi yingiserile kumbe ku byi chaya hi vito ra nala wa wena. Loko mfumo wa ka Gaza a wu ri lowunene i nge tihosi ta va Vatsonga ti nga lwisananga na wona.

Vunanga lebyi, i bya Xitsonga. Hambi eka vakokwa va khale va Vatsonga, ku fana na Magutsulani, Hubyanyana, Bingwani, Mantsena, Gutse, Gulatino etc; ku nge tirhisiwi mavito ma vona ku thya vuyimbeleri bya rixaka hinkwaro. Ku va vanhu va ya emahlweni va vitana vuyimbeleri lebyi leswaku i Xigaza/Xichangana swi hoxekile swinene, vuyimbeleri lebyi i vuyimbeleri bya Xitsonga va ka Gaza a hi vona va nga byi sungula na swona a va nga swi rhandzi leswaku rixaka ra Vatsonga ri kula ri ya emahlweni. A hi tshikeni ku nyika xidlodlo kumbe vun’winyi bya vunanga lebyi eka vanhu lava swi nga va fanelangiku. Vanhu va fanele va tiva leswaku Hi ba Xitsonga, Hi yingisela Xitsonga, Hi tlhela hi cina Xitsonga!!! A hi dyondzeni switsongo hi vayimbeleri vo fana na Dr. Chauke, kumbe hi yingisela hi vukheta swiyimbeleri swa Vatsonga swa le Mozambique. Mi tshama mi va twa va bombisa Gaza? Kumbe va bombisa Xichangani?

Mutsari: Mkhacani wa Mavona Khoseni

Image source: theskinny.co.uk

 
Previous ArticleNext Article

Leave a Reply

Your email address will not be published. Required fields are marked *