• Subscribe to our newsletter and never miss a single post - for FREE
Literature, Short Stories

Ngati ya Maxaka!

Ku fika ka Nziyane, ku twali movha ku duma, ivi yi tima hi matimba ngaku yo fika yi fela kwalaya gedeni. Leswi movha a wu voningi swidulwani swa ka Chavani hi tlhelo ra xivala xa kwalaya ka Xinyami, ku lo na chika Nziyane ku tlakuka ritshuri, ri vuya ri losa.

“i Boti Nziyane!” n’wana Hahani wa Nziyane, lowo aliwa hi va ka Chavani, a huwelela makwavo hi ku tsaka a kha a tsutsumela eka Hosi yakwe, kasi u ta hlanganisiwa hi njamba wa MPAMA! Nziyane a koka voko ra mfenhe, a ba xi ku choo! ehansi, xi sungula ku raha-raha, no xi na malembe ya khume a swi n’wu tlhavangi helo.

Ku te loko Nziyane a fika a ndyangu, a huwelela Kokwani wakwe hi rito ra sathani, “N’waXigatlu!”

Ku huma ka Mukhegulu yi hlanganisiwi hi ntukulu a tshukisi matihlo, a khomi banga evokweni ra xinene, a ri ku hefemutekeni bya xihari xa nhova loko xi vona ngati. Mukhegulu va swi hlayini ku siku ra ngati se ri kwala, hi loko va tlhentlha hi vukheta, kasi vo yi kandiya ncila! Nziyane a nga hetangi nkarhi, u lo na kongoma eka Mukhegulu, ngati yi boboma yi tlunya ta mincele.

Hi loko a siya ntsumbu wa Mukhegulu wu ri dan’wini ra ngati, ivi gila rivanti ra Papantsongo hi rivilo, GWHA! Tatana Hlengani Xinyami va yi pfuxi yi nga jokelangi, yi fisi sweswi yi nga tisa xiswona emisaveni. Nziyane u boxi Papantsongo nghangha hi banga, leswi a yi ringeta ku lwa, u yi hlakati xikanda hambi se yi timini.

Ku huma ka Nziyane endlwini ya Papantsongo, u hlanganisiwe hi vaaka-tiko vo hlaya, na va ka Chavani a va ri kona, hambi leswi va nga ngheniku ka Xinyami. Nziyane u langute vaaka-tiko hi tihlo ra ngati ku va komba ku loyi a nga ta n’wu hahela u dlewe. Ku te loko va ha hlamele ku dzwihala ka ngati leyi a yi thona eka banga ra Nziyane, hi loko a kongoma ndlwini ya mazenge, a ringeta ku pfula rivanti kambe ri n’wu tsanda.

“Hahani!”
“Wena Phylia!”
“Pfula la!”
Nziyane a bonga bya nghala, a raha rivanti hi matimba kambe ri n’wu tsanda ku ri wisa, hi loko a hoxa banga ri hlahla ngilazi ya fasitere. Ivi vavanuna va muganga va vhe va n’wu hahela va n’wu vuyisa ehansi. Nziyane a sungula ku huwelela no rila, “Ni tshikeni ni va heta! Ni ri ni tshikeni ni va heta!”

Vaaka-tiko va voni swi antswa ku bohelela Nziyane eka nsinya loko va ha rindi maphorisa na ambulance.

“Mi serious he… Mi sirhelela ma’devil lawaya?” hi nkarhi lowu, Nziyane a a heli matimba, na rito rakwe a ri twalela ehansi.

“Ma yi tiva mbitsi ya mina he?”
“Leswi va nga khendla hi n’wananga! Mi ta ni vuyisela yena na?
“A swo ka swi nga ringanangi ku pfula Mhani? NA VUTISA…”

– Mzamani wa Cheleni

Image Source: iwatchstuff.com

 
Previous ArticleNext Article

Leave a Reply

Your email address will not be published. Required fields are marked *